समाचार » बस दुर्घटनामा मर्नेको संख्या १० पुग्यो

###

सोक्माटार (ओखलढुंगा), माघ १८ - यहाँको थाक्ले ८ सोक्माटारमा शुक्रबार साँझ भएको बस दुर्घटनामा मर्नेको संख्या १० पुगेको छ ।

बा.२ ख. ७०६३ नम्बरको बस सिन्धुलीबाट खोटाङको हलेसी जाने क्रममा सडकबाट खसेको थियो । मर्नेहरुमा झाँगाझोली ३ सिन्धुली एउटै ठेगाना भएका ३५ वर्षीय अनुज अंकारी गिरी, ३५ वर्षकै मणिराम गिरी, १२ वर्षीया अनिशा गिरी, ३० वर्षीया पूर्णमाया श्रेष्ठ, रमेश गिरी, सावित्री गिरी, ६१ वर्षीया सावित्रीमाया श्रेष्ठ, ६० वर्षीया सुकुमाया श्रेष्ठ, ५१ वर्षीय पूर्णप्रसाद वैद्य र बाहुनीडाँडा ५ खोटाङका २१ वर्षीय प्रविण राई छन् ।
यी मध्ये तीन जनाको घटनास्थलमै मृत्यु भएको थियो भने अन्यको उपचारका लागि लाने क्रममा र उपचारको क्रममा मृत्यु भएको प्रहरीले जनाएको छ । मृतक अधिकांशको सनाखत भइसकेको छ । मृतकमध्ये आठजनाको पोष्टमार्टम उदयपुरको कटारीमा भइरहेको कटारीका प्रहरी नायब उपरीक्षक किसनसिं थापाले बताए ।
दुर्घटनामा कम्तीमा चार दर्जन बढी घाइते छन् । आफन्त र प्रत्यक्षदर्शीका अनुसार गम्भीर घाइतेको संख्या अझै भएकोले मृतक संख्या बढ्न सक्ने सम्भावना छ । गम्भीर घाइतेको उपचारका लागि विराटनगर र काठमाडौं लगिएको जिल्ला प्रहरी कार्यालय ओखलढुंगाका प्रहरी नायब उपरीक्षक गोविन्द अधिकारीले बताए । सडकबाट तीन सय मिटर जति तल खसेको बस तीव्र गतिको कारण पल्टिएको हुनसक्ने प्रहरीको अनुमान छ । बसमा क्षमता भन्दा बढी यात्रु रहेको स्थानीयको भनाई छ ।
####

0 comments

Write Down Your Comment